കേരള സർവകലാശാലയിൽ സണ്ണി ലിയോണിയുടെ പരിപാടിക്കു വിലക്ക്
തിരുവനന്തപുരം: കേരള സർവകലാശാലാ കാര്യവട്ടം കാമ്പസിലെ യൂണിവേഴ്‌സിറ്റി എൻജിനിയറിങ് കോളേജിൽ ബോളിവുഡ് നടി സണ്ണി ലിയോണിയുടെ സ്റ്റേജ് പരിപാടി നടത്താനുള്ള നീക്കം വൈസ് ചാൻസലർ ഡോ. മോഹൻ കുന്നുമ്മൽ തടഞ്ഞു. ഇതുസംബന്ധിച്ച്‌ രജിസ്ട്രാർക്കാണ് നിർദേശം നൽകിയത്.
ജൂലായ് അഞ്ചിന് പരിപാടി നടത്താനാണ് കോളേജ് യൂണിയൻ തീരുമാനിച്ചിരുന്നത്. ഇതിന് സർവകലാശാലയുടെ അനുമതി വാങ്ങിയിട്ടില്ല. പുറമേനിന്നുള്ള ഡി.ജെ. പാർട്ടികൾ, സംഗീതനിശ തുടങ്ങിയവ കാമ്പസിൽ നടത്തുന്നത് സർക്കാർ നിരോധിച്ചിട്ടുണ്ട്.
ഈ ഉത്തരവ് നിലനിൽക്കുമ്പോഴാണ് സർവകലാശാലയുടെ അനുമതി കൂടാതെ സണ്ണി ലിയോണിയുടെ പരിപാടി നടത്താൻ എൻജിനിയറിങ് കോളേജ് യൂണിയൻ തീരുമാനിച്ചത്. വിദ്യാർഥികൾ ഇത്തരം പരിപാടികൾ കാമ്പസിലോ പുറത്തോ യൂണിയന്റെ പേരിൽ സംഘടിപ്പിക്കാൻ അനുവദിക്കില്ലെന്ന നിലപാടിലാണ് വി.സി.
